ഗ്നു/ലിനക്സിന്റെ ചരിത്രം

* അമേരിക്കയിലെ ഹാക്കര്‍മാരുടെ ഇടയില്‍ RMS എന്ന ചുരുക്കപ്പേരില്‍ അറിയപ്പെട്ടിരുന്ന റിച്ചാര്‍ഡ്‌ മാത്യു സ്റ്റോള്‍മാന്‍ 1971 - ല്‍ പ്രസിദ്ധമായ MIT യിലെ ആര്‍ട്ടിഫിഷ്യല്‍ ഇണ്റ്റലിജന്‍സ്‌ വിഭാഗത്തില്‍ പ്രോഗ്രാമറായി ജോലിയില്‍ പ്രവേശിച്ചു. അക്കാലത്ത്‌ പ്രോഗ്രാമര്‍മാര്‍ തമ്മില്‍ കോഡ്‌ കൈമാറുക പതിവായിരുന്നു.

* 1980 കാലഘട്ടത്തില്‍ പുതിയ ഒരു പ്രവണത രൂപമെടുത്തു. കോഡ്‌ രൂപപ്പെടുത്തുന്ന കമ്പനികള്‍ അത്‌ കൈമാറാന്‍ വിസമ്മതിക്കുകയും അത്‌ കോപ്പിറൈറ്റ്‌ ചെയ്യാന്‍ ആരംഭിക്കുകയും ചെയ്തു.
* സോഫ്‌റ്റ്‌വെയര്‍ എന്നാല്‍ വിദ്യ (അറിവ്‌) ആണെന്നും അത്‌ കൈമാറും തോറും വികസിക്കുകയേയുള്ളൂ എന്നും വിശ്വസിച്ചിരുന്ന സ്റ്റോള്‍മാന്‍ ഈ പ്രവണതയ്ക്ക്‌ എതിരായിരുന്നു.
അങ്ങനെ 1985 ല്‍ അദ്ദേഹം സ്വതന്ത്ര സോഫ്‌റ്റ്‌വെയറില്‍ വിശ്വസിക്കുന്നവരുടെ കൂട്ടായ്മയായ ഫ്രീ സോഫ്‌റ്റ്‌വെയര്‍ ഫൌണ്ടേഷന്‌ രൂപം കൊടുക്കുകയും GNU മാനിഫെസ്റ്റോ പ്രസിദ്ധീകരിക്കുകയും ചെയ്തു.
* യുണിക്സിനോടു സാദൃശ്യമുള്ള GNU എന്ന സ്വതന്ത്ര ഓപ്പറേറ്റിംഗ്‌ സിസ്റ്റം ഉണ്ടാക്കുകയായിരുന്നു അദ്ദേഹത്തിണ്റ്റെ ലക്ഷ്യം. GNU Is Not Unix എന്നാണ്‌ GNU വിണ്റ്റെ പൂര്‍ണ്ണരൂപം. സ്റ്റോള്‍മാനും സമാനചിന്താഗതിക്കാരായ മറ്റുചില പ്രോഗ്രാമര്‍മാരും ചേര്‍ന്ന് GNU  ഓപ്പറേറ്റിംഗ്‌ സിസ്റ്റത്തിനു വേണ്ട ടൂളുകള്‍ നിര്‍മ്മിക്കാന്‍ തുടങ്ങി. അതേ വര്‍ഷം തന്നെ പ്രൊഫ: ആന്‍ഡി ടാനെന്‍ബാം യുണിക്സിനോടു സാദൃശ്യമുള്ള മിനിക്സ്‌ എന്ന ഓപ്പറേറ്റിംഗ്‌ സിസ്റ്റം നിര്‍മ്മിച്ചു.

* 1989  ല്‍ സ്റ്റോള്‍മാന്‍ GNU  ജനറല്‍ പബ്ളിക്‌ ലൈസന്‍സ്‌ എന്ന പേരില്‍ ഇന്നത്തെ GPL  ണ്റ്റെ ആദ്യരൂപം പുറത്തിറക്കി. അദ്ദേഹം തണ്റ്റെ പ്രോഗ്രാമുകളെല്ലാം ഈ ലൈസന്‍സ്‌ പ്രകാരം എല്ലാവര്‍ക്കും ലഭ്യമാക്കി. ഈ സമയം GNU  ഓപ്പറേറ്റിംഗ്‌ സിസ്റ്റത്തിന്‌ ആകെ ഒരു കുറവ്‌ പറയാനുള്ളത്‌ അതിന്‌ നല്ല ഒരു കെര്‍ണല്‍ (കമ്പ്യൂട്ടറിണ്റ്റെ ഹാര്‍ഡ്‌വെയറുമായി നേരിട്ട്‌ സംവദിക്കുന്ന ഭാഗം) ആയിരുന്നു.

* 1990  ല്‍ ഒരു ഫിന്നിഷ്‌ വിദ്യാര്‍ദ്ധിയായ ലിനസ്‌ ടോര്‍വാള്‍ഡ്‌സ്‌ തനിക്ക്‌ പ്രോജക്റ്റിണ്റ്റെ ഭാഗമായി മിനിക്സിണ്റ്റെ കോഡ്‌ വേണമെന്ന ആവശ്യവുമായി ടാനെന്‍ബാമിനെ സമീപിച്ചു. ലിനസിന്‌ മിനിക്സിലേക്ക്‌ കുറച്ച്‌ പരിഷ്കാരങ്ങള്‍ ചേര്‍ക്കണമെന്ന് ഉണ്ടായിരുന്നു. പക്ഷേ കോഡ്‌ നല്‍കാന്‍ ടാനെന്‍ബാം തയ്യാറായില്ല. ഇതേ തുടര്‍ന്ന് ലിനസ്‌ സ്വന്തമായി ഒരു കെര്‍ണല്‍ വികസിപ്പിച്ചെടുത്തു. ഇതാണ്‌ ഇന്നത്തെ ലിനക്സിണ്റ്റെ ആദ്യ രൂപം. ലിനസ്‌ നിര്‍മ്മിച്ച കെര്‍ണലിനോടു കൂടി GNU  വിനു വേണ്ടി നിര്‍മ്മിച്ച പ്രോഗ്രാമുകളും കൂടി ചേര്‍ന്നതിനെയാണ്‌ GNU/Linux (ഗ്നു/ലിനക്സ്‌) എന്നു പറയുന്നത്‌.

ഫ്രീ സോഫ്‌റ്റ്‌വെയര്‍ വിപ്ളവത്തെ പറ്റി

ഫ്രീ സോഫ്‌റ്റ്‌വെയര്‍ എന്നു കേള്‍ക്കുമ്പോള്‍ എല്ലാവരും ആദ്യം ഓര്‍ക്കുക ഗ്നു/ലിനക്സിനെ പറ്റിയാണ്‌. ഫ്രീ സോഫ്‌റ്റ്‌വെയറ്‍ ഉപയോഗിക്കുന്നവരുടെ പ്രിയപ്പെട്ട ഓപ്പറേറ്റിംഗ്‌ സിസ്റ്റമാണ്‌ ഗ്നു/ലിനക്സ്‌. ആദ്യമൊക്കെ പ്രോഗ്രാമര്‍മാരും കമ്പ്യൂട്ടര്‍ വിദഗ്‌ധരും മാത്രം ഉപയോഗിച്ചിരുന്ന ലിനക്സ്‌, പക്ഷേ ഇന്ന് വളരെയേറെ വളര്‍ന്നു കഴിഞ്ഞു. ഇന്ന് കമ്പ്യൂട്ടര്‍ പ്രാവീണ്യം കുറഞ്ഞവര്‍ക്കും ഉപയോഗിക്കാവുന്ന വിധം ലളിതമായി കഴിഞ്ഞു ഇത്‌. അതുപോലെ ഹാര്‍ഡ്‌വെയര്‍ പിന്തുണയും വളരെയേറെ വളര്‍ന്നു കഴിഞ്ഞു. ഇന്ന് വിപണിയിലുള്ള ഒട്ടുമിക്ക ഹാര്‍ഡ്‌വെയര്‍ ഘടകങ്ങളേയും ലിനക്സ്‌ പിന്തുണയ്ക്കുന്നുണ്ട്‌. ഇന്ന് സോഫ്‌്‌റ്റ്‌വെയറില്‍ മാത്രം ചെയ്യാന്‍ കഴിഞ്ഞിരുന്ന എല്ലാ ജോലികളും സ്വതന്ത്ര സോഫ്‌റ്റ്‌വെയര്‍ ഉപയോഗിച്ച്‌ ചെയ്യാന്‍ കഴിയും. ഇതിന്‌ ഒരു ഉത്തമ ഉദാഹരണമാണ്‌ http://www.bigbuckbunny.org/ പൂര്‍ണ്ണമായും സ്വതന്ത്ര സോഫ്‌റ്റ്‌വെയര്‍ ഉപയോഗിച്ച്‌ നിര്‍മ്മിച്ച ഒരു ത്രിമാന ചലച്ചിത്രമാണിത്‌.

FOSS - നെ പറ്റി ഒരു വാക്ക്‌

FOSS എന്നാല്‍ Free & Open Source Software അഥവാ സ്വതന്ത്ര സോഫ്‌റ്റ്‌വെയര്‍. ഫ്രീ എന്ന വാക്ക്‌ ഇവിടെ ധാരാളം തെറ്റിദ്ധരിക്കപ്പെടുന്നുണ്ട്‌. ഫ്രീ എന്നാല്‍ ഇവിടെ സൌജന്യം അല്ല. മറിച്ച്‌ സ്വതന്ത്രം ആണ്‌. തെളിച്ചു പറഞ്ഞാല്‍ ഫ്രീ സോഫ്റ്റ്‌വെയര്‍ എപ്പോഴും സൌജന്യമായിക്കൊള്ളണമെന്നില്ല. അത്‌ സ്വതന്ത്ര സോഫ്‌റ്റ്‌വെയറിനെ സൂചിപ്പിക്കുന്നു.

എന്താണ്‌ സ്വതന്ത്ര സോഫ്‌റ്റ്‌വെയര്‍?

ഒരു സോഫ്‌റ്റ്‌വെയര്‍ സ്വതന്ത്രമാണെന്നു പറഞ്ഞാല്‍ അത്‌ ഉപയോഗിക്കുന്ന ആളിണ്റ്റെ നാലു തരത്തിലുള്ള സ്വാതന്ത്ര്യങ്ങളെ കുറിക്കുന്നു.

1) അത്‌ എന്ത്‌ ആവശ്യത്തിനും വേണ്ടി ഉപയോഗിക്കുന്നതിനുള്ള സ്വാതന്ത്ര്യം

2) അത്‌ എങ്ങനെയാണ്‌ പ്രവര്‍ത്തിക്കുന്നത്‌ എന്നു മനസ്സിലാക്കാനും അതില്‍ മാറ്റങ്ങള്‍ വരുത്തുന്നതിനും ഉള്ള സ്വാതന്ത്ര്യം. ഇതിനു വേഃണ്ടി സോഴ്‌സ്‌ കോഡ്‌ ലഭ്യമായിരിക്കണം

3) ആ സോഫ്‌റ്റ്‌വെയറിണ്റ്റെ കോപ്പി നിങ്ങളുടെ സുഹൃത്തുക്കള്‍ക്കോ ബന്ധുക്കള്‍ക്കോ കൊടുക്കാനുള്ള സ്വാതന്ത്ര്യം

4) സോഫ്‌റ്റ്‌വെയര്‍ നിങ്ങളുടെ കഴിവിനനുസരിച്ച്‌ പരിഷ്കരിക്കുവാനും അത്‌ ലോകത്തിനു വേണ്ടി സംഭാവന ചെയ്യാനും ഉള്ള സ്വാതന്ത്ര്യം.

ഈ നാലു സ്വാതന്ത്ര്യങ്ങളും ഉപയോക്താവിനു നല്‍കുന്ന ഉല്‍പ്പന്നമാണ്‌ ഒരു സ്വതന്ത്ര സോഫ്‌റ്റ്‌വെയര്‍

കൂടുതല്‍ വിവരങ്ങള്‍ ഇവിടെ ലഭ്യമാണ്‌.

ഈ ലോകത്ത്‌ മറ്റേത്‌ ഉല്‍പന്നം വാങ്ങിയാലും ഈ നാലു സ്വാതന്ത്ര്യങ്ങളും (Use, Study, Modify, Distribute)കിട്ടും. പിന്നെ സോഫ്‌റ്റ്‌വെയറിനു മാത്രം എന്തിനു കുത്തകകളെ ആശ്രയിക്കണം ? ഈ ആശയത്തോടു യോജിക്കുന്നു എങ്കില്‍ ഇന്നു മുതല്‍ സ്വതന്ത്ര സോഫ്‌റ്റ്‌വെയര്‍ വിപ്ളവത്തില്‍ പങ്കാളിയാകുക. സ്വതന്ത്ര സോഫ്‌റ്റ്‌വെയര്‍ പ്രചരിപ്പിക്കുക.